оправда

Значење на оправда:

1. Ослободи некого од обвинение или одговорност, признавајќи го за невин. Поради недостиг на докази судот го оправда обвинетиот. Ако се покаеш, ќе те оправдаат.

2. Објасни, одбрани некаква постапка; признае нешто за правилно, допустливо, возможно; одобри, дозволи нешто. Тој се обидуваше да ја оправда својата постапка. Постојано бараше начин да го оправда нејзиното однесување.

3. Потврди, докаже дека е нешто точно, правилно. Развитокот на македонскиот литературен јазик ги оправда погледите на Мисирков. Научниот собир ја оправда својата цел.

4. Покаже, докаже дека навистина заслужува нечија доверба и сл. Вети дека ќе ја оправда довербата што му е укажана.

5. Поднесе, достави документи за направени трошоци. Ја достави сметката за да ги оправда патните трошоци.

Конјугација: оправдаат.

Изведени зборови:

• оправдување, глаг. им. ср.
• се ~ оправда, Симне од себе сомнеж, вина; ја докаже оправданоста на својата постапка и сл. Тој ме праша како ќе се оправдам на работа. Треба само патем да пронајдам некоја причина да се оправдам што доаѓам.
• (се) оправдува, глаг. несв. (се) оправдуваат