совлада

Значење на совлада:

1. а) Победи, надвие во борба. Лесно го совлада противникот. Со здружени сили го совладаа непријателот. б) Победи, надвие во спортски натпревар. Нашата екипа ја совлада гостинската со три гола разлика. Ја совладавме првопласираната екипа на табелата.

2. Се справи со пречки, тешкотии, работа, напор и сл. Ги совлада сите тешкотии во животот. Војската ги совлада бунтовниците. Со мака го совлада остриот свиок.

3. Припитоми, промени природа или природни појави. Човекот ја совлада природата. Ги совладаа брзите води на реката.

4. (прен.) За чувство ‒ превозмогне, преброди, обузди. Ја совлада лутината. Ја совлада возбудата. Го совлада гневот.

5. (прен.) За сон, замор и сл. ‒ обземе, опфати. Сонот го совлада и заспа. Заморот ја совлада и задрема. Стравот ги совлада и се разбегаа наоколу.

6. а) Научи, изучи, извежба лекција, текст, занает и сл. Го совлада материјалот. Ја совлада вештината на готвењето. Ја совлада техниката на сликање. Го совлада резбарскиот занает. б) Научи јазик. Брзо го совлада англискиот јазик.

Конјугација: совладаат.

Изведени зборови:

• се ~ совлада, Се воздржи, се обузди, размисли трезвено. Татко му одвај се совлада да не го удри. Таа одвај се совлада да не се развика.
• (се) совладува, глаг. несв. (се) совладуваат
• совладување, глаг. им. ср.