свие

Значење на свие:

1. Придаде на нешто полукружна форма; наклони, наведне нешто надолу. Со силните раце ковачот лесно го сви железото. Песот ја сви опашката и со квичење замина. Ветрот ги сви младите и кревки гранки на јаболкницата во дворот.

2. За дел од телото ‒ изврти, искриви. Стражарот брзо му ги сви рацете на затвореникот одзади и му ги стави лисиците.

3. Завие, завитка нешто во некаква форма. Младиот човек ја сви картата и се упати кон местото. Продавачката го сви весникот како фишек и во него ги стави костените.

4. Обвие нешто околу некого; состави. Тој ги сви рацете околу вратот на девојката.

5. За птици ‒ направи, создаде гнездо. Напролет во напуштената куќа свија седело за да ги изведат своите малечки.

6. (прен.) Обземе, опфати, исполни некого некое чувство (тага, непријатно чувство и сл.). Неизмерна тага и болка ја сви мајката и лицето како да ѝ потемне, снагата ѝ се скрши.

7. Измени правец, скршне од патот. а) Некој или нешто што е во движење. Девојката сви зад аголот, не свртувајќи се по чекорите што ја следеа. Колата сви во тесната уличка и им се изгуби од видикот. б) За пат. Малата козја патека ненадејно сви кон долината.

8. (само во 3 л.) Добие грчеви, болки во некој дел од телото, обично стомак, грб и сл. Одеднаш ме сви стомакот. Грбот толку го сви што не можеше да се исправи.

Коњугација: (ќе) свиев , (ќе) свиеја , (ќе) свиел , свив , свиен, свиј , свија , свијат , свијте , свил .

Изведени зборови:

• свивање, глаг. им. ср.
• (се) свива, глаг. несв. (се) свиваат
• се ~ свие, 1. Се искриви, се згрбави. Тој се сви малку во грбот, се залепи до стаклото и гледаше во шините. Ми се сви ногата кога паднав на мразот. 2. За дрвја, гранки и сл. ‒ се наведне од ветер, снег и сл. Дрвјата се свија од силниот ветар. Младите брези се свија од тежината на снегот.

Фразеолошки израз / поговорка:

Свие гнездо ‒ создаде семејство. Свие опашка ‒ стане поскромен, се покори, се предаде.