танок

Значење на танок:

1. Што е со мала дебелина, што е со мал напречен пресек. Танка хартија. Танко платно. Танка жица. Танка линија. Танок врат. Танки прсти. Танок клун.

2. Што не е густ, проѕирен. Танки облаци. Танка магла. Танок чад. Танка пајажина.

3. Што содржи помал процент на алкохол; што содржи помалку маснотија; што не е густ, што е разреден, разводнет. Танка ракија. Танок шприцер. Танко млеко. Танка чорба.

4. За човек – што е висок и слаб; виток. Танка става.

5. Што е со висок тон, писклив. Танко гласче. Танко липање. Танок писок.

6. (прен.) Што е истанчен, чувствителен, профинет. Танок поетски усет.

7. (прен.) Што е мал, одвај забележлив. Танка разлика.

8. Што е подробен, детален. Раскажуваше во најтанки детали.

9. Што е мал по количина или вредност, сиромашен, оскуден. Јадеа танка вечера.

Членувана форма: танкиот.

Изведени зборови:

• танкост, и. ж.

Фразеолошки израз / поговорка:

Овде сум најтанок (покажувајќи на вратот) пресечи ме – за докажување на вистинитоста на исказот. Каде е танко – таму се кине. (посл.)