необјаснив | прид.
Што не може да се објасни. Необјаснива појава. Необјасниви страсти. Необјаснива промена.
неовенат | прид.
Што не е овенат; свеж. Неовенато цвеќе.
неовластен | прид.
Што не е овластен; Неовластено лице.
неограничен | прид.
Што не е ограничен, што нема ограничување, што е без граници. Неограничена власт. Неограничени права. Неограничени можности. Неограничена доверба.
неодамна | прил.
Пред кусо време, сега бргу, не многу одамна. Неодамна си отидоа. Неодамна се доселија.
неодамнешен | прид.
Што се случил неодамна, што е пред кусо време. Неодамнешна посета. Неодамнешни разговори.
неодбирлив | прид.
Што не се одбира, што не се разбира; нејасен, неразбирлив. Неодбирлив ракопис.
неодбранлив | прид.
Што не може да се одбрани, од кој нема одбрана. Неодбранлив напад. Неодбранлив удар. Неодбранлив гол (во спортот).
неодгатлив | прид.
Што не може да се одгатне. Неодгатлив сон. Неодгатлив цртеж.
неодговорен | прид.
Што не чувствува одговорност, што е без чувство за одговорност. Неодговорен раководител.
