дезинфицира | св. и несв.
Изврши, извршува дезинфекција. Лекарот ја дезинфицира раната со алкохол.
дезинформација | ж.
Лажно, погрешно, неточно (најчесто злонамерно) известување, пренесување информации. Во текстот се провлекла и една дезинформација. Тоа се невистини и дезинформации од одделни поединци.
дезинформира | св. и несв.
Даде, дава неточна информација, лажно или погрешно извести, известува за нешто. Тие беа заведени и дезинформирани.
дезорганизација | ж.
Лоша организираност, нарушување на организацијата, на редот; безредие, хаос. Смената на директорот предизвика дезорганизација во фирмата.
дезорганизира | св. и несв.
Предизвика, предизвикува дезорганизација, внесе, внесува неред, хаос во нешто. Нашата цел е да го дезорганизираме непријателот.
дезориентација | ж.
Отсуство на способност за ориентација, за снаоѓање во просторот; губење на ориентацијата.
дезориентира | св. и несв.
Предизвика, предизвикува дезориентација; внесе, внесува забуна, збрка кај некого, во нешто. Нашата акција го дезориентира противникот.
деизам | м.
Религиозно-филозофско сфаќање според кое Бог е безличен творец на светот, но нема никакво влијание врз неговиот натамошен тек. Тој е припадник на деизмот.
дека | сврз.
Во исказни зависносложени реченици; оти. Тој рече дека ќе дојде. Таа мисли дека научила. Тие сфаќаат дека работата не оди.
декабрист | м.
Учесник во востанието од 1825 година на група благородници против самодржавјето во царска Русија.
