контролира | св. и несв.
Изврши, врши, контрола, прегледа, прегледува, провери, проверува. Учителот ги контролира учениците.
контролор | м.
Тој што врши контрола; надзорник. Работи како контролор во поштата. Контролор на летање. Публиката е најстрог контролор на писателот.
контузија | ж.
Повреда на телото предизвикана од триење или од удар со тап предмет, при пад или од силен притисок на воздух; нагмеченост. Од бомбата имаше контузија на градите.
контузува | св. и несв.
Нанесува, нанесе контузија.
контумација | ж.
(прав.) Неодзивање на судски наредби или покани.
контура | ж.
Линија што оди на работ, што оцртува нешто. Ги нацрта контурите на лицето. Се наѕираат контурите на езерото.
контурен | прид.
Што се однесува на контура. Контурни линии.
конус | м.
Геометриско тело чии контури се добиваат со вртење на еден правоаголен триаголник околу една од страните што го образуваат правиот агол. Вертикален конус. Кос конус.
конусен | прид.
Што се однесува на конус. Конусен пресек.
конусовиден | прид.
Што е во форма на конус. Конусовиден грозд.
