кибарски | прид.
Како прид. Што се однесува на кибар.
кибернетика | ж.
Наука за општите принципи и законитости во процесот на управување, пренос, обработка и чување на информации во машините, живите организми и во економските системи.
кибернетичар | м.
Тој што се занимава со кибернетика.
кибицер | м.
Љубопитен набљудувач на игри со карти, шах, спортски игри и сл. Таму се играше шах, кибицерите ги поклопуваа играчите.
кибицира | несв.
а) Љубопитно набљудува игри со карти, шах, спортски игри и сл. Тој можеше да ги кибицира твоите карти. б) Набљудува, гледа со интерес и уживање воопшто. Момчето од соседната маса упорно ја кибицираше.
кибрит | м.
Кутија што содржи мали дрвца, коишто од едната страна се обложени со запалива материја за брзо палење. Скокни до дуќанчето и купи два-три кибрити.
кибритен | прид.
Што се однесува на кибрит. Кибритно дрвце.
кива | несв.
Со нагло рефлексно стегање на градниот кош, исфрла, истиснува воздух од белите дробови преку нос и уста, испуштајќи карактеристичен звук. Настинат е, постојано кашла, кива и шмрка со носот. Замириса на изгорени пиперки и луѓето почнаа да киваат и да слегуваат од куќите.
кивавица | ж.
Акутно воспаление на слузницата на носот, најчесто при настинка, придружено со нагло исфрлање на воздух преку носот и устата.
кивавичав | прид.
Тој што има кивавица, што постојано кива и шмрка со носот. Беше зиморлив и кивавичав, лете и зиме со мрсулав нос.
