адмирал | м.
Највисок чин во воената морнарица. Адмиралот изврши смотра.
адмиралитет | м.
Врховна команда на воената морнарица; зграда во која се наоѓа таа. Францускиот адмиралитет ни нареди да се истовариме.
адолесцент | м.
Лице во периодот на адолесценција.
адолесценција | ж.
Пубертет, периодот од почетокот на пубертетот до настанувањето на зрелоста. Периодот на адолесценција изобилува со физички промени.
адреналин | м.
Хормон на надбубрежната жлезда.
адреса | ж.
Ознака за нечие место на живеење, име или број на определена локација. Тој е сѐ уште на старата адреса.
адресант | м.
Испраќач на писмо, поштенска пратка или на порака. Адресантот беше непознат.
адресар | м.
Список на адреси. Протоколарната листа содржи адресар.
адресат | м.
Примач на писмо, поштенска пратка или на порака, оној кому му е нешто упатено, наменето. Институтот е адресатот за пријавите на конгресот.
адресира | св. и несв.
Стави, става, напише, пишува адреса на поштенска пратка. Таа го адресираше писмото за својот пријател.
