идентитет | м.

Особини или својства по кои едно лице или предмет се изделува и се разликува од другите; еднаквост, истост. Се трага по идентитетот на непознатиот ограбувач. Со посебни постапки се утврдува идентитетот на лековите. Белези на националниот идентитет.

идентификација | ж.

Утврдување на идентитет, идентификување. Знак за идентификација е личното име. Се изврши идентификација на трупот.

идентификува | св. и несв.

а) Утврди, утврдува идентитет, еднаквост. Беше повикан да го идентификува убиецот. б) Изедначи, изедначува некого или нешто со некого или нешто. Поимот држава тој го идентификува со поимот нација.

идентифицира | св. и несв.

идентичен | прид.

Ист, еднаков. Идентичен опис. Идентична судбина. Идентични односи.

идеограм | м.

Цртеж или слика што претставува поим, писмен знак во сликовното писмо. Кинески идеограм.

идеографија | ж.

Писмо што користи идеограми, сликовно писмо.

идеолог | м.

Тој што создава, развива некаква идеологија. Идеолог на Народноослободителното движење.

идеологизација | ж.

идеологизира | св. и несв.

Внесе, внесува прекумерно или непотребно идеологија во нешто, во некоја дејност.