Плавуш | м.
Планина во Македонија.
плагира | св. и несв.
Врши, изврши плагијат. Тој плагира многу стихови од туѓа поезија.
плагијат | м.
Присвојување на туѓо авторство, издавање на туѓо уметничко, научно или литературно дело (во целост или со мали измени) под свое име, кражба на авторски права. И мистификацијата во творештвото е плагијат.
плагијатор | м.
Тој што врши плагијат.
пладне | ср.
Времето во (или околу) дванаесет часот, средина на денот. Наближува пладне. Јулско пладне. Пладнето одамна прекршило.
пладневен | прид.
Што се однесува на пладне. Пладневен одмор. Пладневен радиовесник. Пладневна жега. Пладневни оброци.
пладнина | ж.
Пладне. Летна пладнина. Трепери пладнина.
пладниште | ср.
Место каде што пладнува добитокот.
пладнува | несв.
За добиток ‒ лежи, не се движи, одмора на пладне. Овците пладнуваат под сенките на буковата корија.
плажа | ж.
Крајбрежно место прекриено со песок или чакал, со природни погодни услови за капење или посебно уредено. Песочна плажа. Езерска плажа. Нечиста плажа.
