Француска Гијана | ж.
Француска територија во Јужна Америка.
франшиза | ж.
Дел од штетата што врз основа на договорот за осигурување ја сноси осигуреникот.
фрапантен | прид.
Што остава силен впечаток, што паѓа в очи; впечатлив. Фрапантна сличност. Еден фрапантен детаљ ми го привлече вниманието.
фрапира | св. и несв.
Направи, прави, остави, остава некому многу силен впечаток; изненади, изненадува, запрепасти, запрепастува. Таквите податоци збунуваат и фрапираат. Везот просто фрапира со исклучителната оригиналност.
фрас 1 | изв.
За подражавање висок, остар звук при удар со нешто. Фрас, фрас! фрчеше со стапот низ воздухот. Јас со цепеницата по црпката фрас и толку.
фрас 2 | м.
Грч што настанува од страв, особено кај мали деца. Малото добива фрасови, па го носев да го лекува.
фраска | несв.
Удира. Гранките ги фраскаа по рацете и лицето. Камшикот рамномерно фраскаше по коњите.
фрасне | св.
Удри силно со прачка, камшик и сл. Го фрасна со јатаганот по плеќи. Го фрасна коњот со пратот.
фратар | м.
Лице што припаѓа на католичкиот верски ред и живее во манастир; калуѓер, монах кај католиците.
фратрија | ж.
а) Во родовското уредување ‒ заедница од неколку родови. б) Братство, задруга, племе.
