шериф | м.

Службено раководно лице во полицијата во Соединетите Американски Држави и во Англија, полициски началник. Шерифот и неговиот помошник организираа потера по бегалците.

шерифов | прид.

Што му припаѓа на шериф. Шерифова шапка. Шерифовиот пиштол.

шеријат | м.

Збир од четири начела што го означуваат вистинскиот пат како треба да се постапува во општествениот, семејниот и верскиот живот кај муслиманите, прописи од верското и световното право во исламот. Сите муслимани треба да се однесуваат според шеријатот. Тој го искористи правото од шеријатот да има четири жени.

шерпас | м.

Водач при искачување на Хималаите, дел од народот што живее во планините на Непал. Искусни шерпаси.

шесмина | бр.

шеснаесет | бр.

Број за шест поголем од десет, се бележи со бројката 16.

шеснаесет- | претс.

Прв дел од сложенки со значење шеснаесет од тоа што го означува основата во вториот дел од сложенката шеснаесет: шеснаесетгодишен, шеснаесетдневен, шеснаесетмесечен, шеснаесетгодишник, шеснаесетгодишнина.

шеснаесетгодишен | прид.

Што е на возраст од шеснаесет години. Шеснаесетгодишно момче.

шеснаесетгодишник | м.

Лице од машки пол што е на возраст од шеснаесет години.

шеснаесетгодишнина | ж.

Временски период од шеснаесет години; годишнина од некој значаен настан што се случил пред шеснаесет години.