штампа | ж.
Отпечаток, отпечатен орнамент или друг вид слика на хартија, платно и сл. На пликот имаше штампа со царски знак.
штампоса | св.
Остави отпечаток, остави знак, жиг и сл. На крајот го штампоса писмото.
штанга | ж.
Метална прачка во вид на лост. Метални штанги.
штангла | ж.
(кул.) Парче колач, чоколадо и сл. што има форма на дел од прачка. Една штангла чоколадо. Тестото се сече на мали штангли. Чоколадни штангли. Овошни штангли.
штанд | м.
Изложбен и продажен простор; тезга, место на пазар, продажен центар, саем и сл. Штандови со книги. Штанд за женска облека.
штанца | несв.
Произведува премногу брзо, сериски. Штанца уверенија.
штапин | м.
Фитиљ кај експлозивните направи, дел од минско средство. Детонирачки штапин.
штафелаен | прид.
Што се однесува на штафелај или е поврзано со него. Штафелаен сликар. Штафелајно сликарство.
штафелај | м.
Статив со три ногалки врз кој се става, се потпира слика за да може да се изработува. Сликарски штафелај.
штафета | ж.
(спорт.) Палка или некој друг предмет што се предава од еден на друг во групно натпреварување. Штафетата му испадна од рацете на вториот атлетичар. Тој црвсто ја држеше штафетата.
