архивар | м.
Специјалист и службеник во архив. Архиварите ја средуваа документацијата за Институтот. Тој е архивар во нашата општина.
архиварство | ср.
Архивска или архиварска дејност. Сега може да се каже дека архиварството во Македонија има своја традиција.
архивира | св. и несв.
Подреди, подредува, складира и чува документи, списи, акти и слични пишани материјали во определена установа за натамошно проучување и потврдување. Цела недела службата ги архивираше документите. Тие ги архивираат пристигнатите писма.
архивист | м.
Специјалист за проучување архивски материјал, тој што се потпира на архивски истражувања во својата работа.
архиѓакон | м.
Повисоко звање за ѓакон, прв ѓакон.
архиепископ | м.
Поглавар на црковна област од неколку епископии; митрополит.
архиепископија | ж.
Црковна област под управа на архиепископ.
архијереј | м.
Старешина на свештениците; владика.
архимандрит | м.
Највисок чин во монашкиот ред; старешина на монасите во манастирите.
архипелаг | м.
Група острови.
