буниште | ср.
Место каде што се исфрла гнојот, ѓубрето од шталата. Ја рине пондилата, го изнесува гнојот на буниште, им дроби зелје на свињите.
бункер | м.
Складиште. Дрогата била сместена во бункер во автомобилот.
бунт | м.
Отворено противење, изразување незадоволство. Бунтот во училиштето започна со исклучувањето на неколку ученици.
бунтовен | прид.
Што е секогаш готов на бунт. Тој е со бунтовен темперамент. Тој верно ги слика настаните од бунтовната историја на македонскиот народ.
бунтовник | м.
Тој што учестува во бунт, што крева бунт. Врзаните бунтовници, откако влегоа во градот, ги кренаа главите високо.
бунтовнички | прид.
Што се однесува на бунтовник. Бунтовнички водачи. Бунтовнички дух.
бунтовништво | ср.
Активност, дејство на бунтовници. Тој се истакнал со верски фанатизам, шовинизам и бунтовништво.
бунтува | несв.
Поттикнува на бунт. Тој ги бунтуваше слугите против експлоатацијата што ја вршеа над нив нивните господари.
Бур | м.
Поранешен назив за Африканерите во Јужноафриканската Република.
бура | ж.
Силен студен ветер со невреме, обично со дожд или снег. Се очекуваше езерска бура. Малото облаче се претвори во силна бура. Песочна бура. Снежна бура.
