впреде | св.
Испреде повеќе нишки, конци во една. Заедно впреде бели и црвени нишки.
впрочем | мод.
За надоврзување нова мисла, дополнително изнесување некоја околност за кажаното. Тоа се само твои претпоставки, впрочем, неточни. Тој го заврши правото со докторски испит, впрочем не особено сјајно положен.
впушти се | св.
Се стрчне силно, брзо. Кучето силно залаја и му се впушти на зајакот. Полицајците се впуштија накај шумата, мислејќи дека сум таму скриен.
врабец | м.
Малечка сива птица што живее во населени места; Passer domesticus. На трнчето беше слетал врабец.
вработен | прид.
Што работи; што е во работен однос. Треба да се намали бројот на вработените во нашиот колектив. Таа е и мајка и вработена жена.
вработи | св.
Постави, прими некого на работа, во работен однос. Го вработија во една живинарска фарма.
врав | м.
Снопови жито послани на гумно за вршидба. Втераа во секој врав по пет-шест коњи, та до пладнина беа извадени сите три вравови.
враг | м.
Според верските претстави, натприродно суштество што е олицетворение на злото; ѓавол, сатана.
врагов | прид.
Што се однесува, што му припаѓа на враг. Врагова постапка.
враговштина | ж.
Итрина, лукавство. Станал познат по своите враговштини.
