види | изв.
При исчудување. Види, види, што голем маж си бил!
видик | м.
Простор до каде што може да се гледа со голо око, што може да се опфати со поглед. Качен на столот добива поголем видик.
видлив | прид.
Што може да се види, што се гледа. Го изложуваше планот со видливи знаци на возбуда. Едвај видлива насмевка му се појави на лицето.
видливост | ж.
Својство на тоа што може да се види.
видно | прил.
Видливо, очевидно. Беше видно возбуден од средбата.
видовит | прид.
Што може да гледа, да предвидува работи што ќе се случат во иднина, јасновидец, визионер. Видовитата жена им ја претскажуваше судбината на луѓето.
видовиште | ср.
Гледање, посета, визита. Пред четири години беше на видовиште во татковината и пак се врати тука, на туѓина.
видоизмени | св.
Смени изглед, форма на нешто, направи видлива промена. Комисијата го видоизмени својот првобитен предлог. Современата техника го видоизмени животот на нашите луѓе.
видокруг | м.
Видик, хоризонт. Добро ги разгледа предметите што му се наоѓаа во видокругот.
видра | ж.
Животно со издолжено тело приспособено за живот во и покрај вода, многу подвижно и брзо; Lutra lutra. Видрата го фати рипчето, се преврте на плеќи и слатко го изеде пред очите на љубопитните посетители.
