замрачи | св.
Направи нешто да стане мрачно, спречи видливост на нешто; затемни. Тој ги замрачи прозорците со ќебиња. Облаците го замрачија хоризонтот.
замрачување | ср.
Потполно или делумно исчезнување на светлината, затемнување на некое небесно тело што настанува кога едно небесно тело ќе покрие друго или кога ќе падне во сенка на друго небесно тело. Замрачување на сонцето. Замрачување на месечината.
замрда | св.
Почне да мрда. Таа ги замрда прстите. Тој замрда со главата.
замре | св.
Престане да дава јасни знаци на живот. Тој легна во постелата и замре, свртен кон ѕидот. Животните замреа од непозната болест.
замрежи | св.
Покрие нешто со мрежа. Пајаците ги замрежија сите агли на таванот.
замрзи | св.
Почне да ме (те, го...) фаќа мрза, да станувам мрзлив. Го замрзи да работи.
замрзнат | прид.
Што е претворен во мраз, во лед. Замрзната вода. Замрзнато езеро.
замрзне | св.
За течности – мине во состојба на мраз, стане мраз. Ноќеска замрзнала водата во цевките.
замрзнувач | м.
Голем фрижидер за длабоко замрзнување на прехранбени артикли: месо, зеленчук и сл. Замрзнувачот им беше полн со продукти.
замркне | св.
Дочека мрак, ноќ. Замркнавме пред да влеземе во селото.
