интервенција | ж.
Определено дејство чија цел е да го промени текот или состојбата на нешто; мешање, посредување, помагање. Лекарска интервенција. Интервенција на власта.
интервју | ср.
Разговор, наменет за јавноста, што го води новинар со некоја позната личност. Направи интервју. Даде интервју.
интервјуира | св. и несв.
Направи, прави интервју, разговор со видна личност од јавниот живот.
интердисциплинарен | прид.
Што опфаќа и што се однесува на повеќе научни дисциплини. Интердисциплинарни студии.
интерен | прид.
Што е внатрешен, што е наменет, што се однесува на внатрешноста на некоја средина. Интерни болести.
интерес | м.
Особено внимание, наклонетост, насоченост кон некого или кон нешто. Неговиот интерес кон фолклорот потекнува уште од детството.
интересен | прид.
Што побудува интерес; занимлив, привлечен, забавен. Интересна книга. Интересна девојка.
интересент | м.
Лице што е заинтересирано за некого или за нешто. Има голем број интересенти за народната изворна музика.
интересира | несв.
Привлекува, предизвикува нечиј интерес. Политиката не ме интересира. Веќе подолго време го интересира таа жена.
интересност | ж.
Занимливост. Играта веќе ја загуби својата интересност и им стана здодевно на сите.
