сервира 1 | св. и несв.
Постави, поставува, подготви, подготвува маса за јадење, принесе, принесува храна. Таа ја сервира масата за неделниот ручек. Келнерите ја сервираа вечерата.
сервира 2 | св. и несв.
Во спортот (во тенис, одбојка, пинг-понг) ‒ изведе, изведува почетен удар со кој топката се внесува во игра. Нашиот тенисер сервира прв во третиот сет. Домаќините сервираа лошо за време на целиот натпревар.
сервирка | ж.
Жена што работи на сервирање храна во ресторан, пансион, трпезарија и сл.
сервис | м.
а) Служба за давање услуги на граѓаните од најразличен тип. Сервис за поправка на автомобили. Сервис за перење и хемиско чистење облека. б) Зградата во која е сместена таква служба.
сервисен | прид.
Што служи како сервис или се однесува на сервис. Сервисна служба.
сервисер | м.
Лице што врши поправка на електрични апарати, компјутери и сл.
сервисира | св. и несв.
Изврши, врши поправка на некаков механизам, машина и сл. Автомобилот го сервисирав пред два месеца.
сервус | м.
Поздрав меѓу пријатели, блиски луѓе ‒ здраво!
серген | м.
Ѕиден долап, полица.
сергија | ж.
Привремена продавница на отворено. Од страните на манастирскиот двор една до друга беа наредени сергии со секакви занаетчиски производи.
