формација | ж.
Образување, форма, градба, состав, структура. Новата стилска формација ги користеше достигањата на претходните. Големата пештера се наоѓаше во формацијата на бочната карпа.
формира | св. и несв.
Даде, дава форма, вид на нешто; изгради, изградува, развие, развива, оформи, оформува. Уште од рана возраст детето го формира карактерот. Тогаш тој го формира своето мислење за него. Подоцна тој формира семејство.
формула | ж.
Краток и точен зборовен израз што содржи некаква вистина, законитост и сл., определба на нешто; правило, образец, стереотипна фраза, усвоен начин на изразување.
формулар | м.
Стандарден документ, отпечатен образец за пополнување.
формулација | ж.
Јасно и концизно изразена мисла, законска одредба и сл; определба. Оваа формулација можеме да ја прифатиме како точна. Треба да се внимава на правилната формулација на речениците.
формулира | св. и несв.
Даде, дава точен, јасен и концизен израз на мисла, став, предлог и сл.; изрази, изразува нешто во вид на формулација. Правилата треба да се формулираат едноставно. Ќе предочам неколку заклучоци и ќе формулирам неколку поставки.
форсира | св. и несв.
Забрзано спроведе, спроведува нешто давајќи му предност, поттикне, поттикнува кон побрзо извршување; забрза, засили. Младите ги форсираат туѓите зборови. Тие го форсираа производството на овошје оваа година.
форсиран | прид.
Што е забрзан, напорен. Форсирано темпо.
форте | ср.
Во музичко дело - динамички знак за силна, гласна изведба на тоновите; самата таква изведба.
фортепијано | ср.
Вид музички инструмент сличен на пијано.
