функција | ж.
а) Професионално или друго задолжение, поле на дејност, работа; служба, должност. Тој имаше висока функција во општеството. Долго време е на раководни функции во фирмата. б) Задача, улога, цел. Воспитната функција на литературата се состои во формирање на личноста. Семинарот успешно ја исполнува својата функција.
фунта | ж.
Мерна единица за тежина во некои земји.
фураж | м.
Храна за добиток, добиточна, сточна храна. Стеблото и лисјата на шеќерната пченка се одличен фураж за добитокот. Овесот е наменет за исхрана на човекот и за фураж.
фуражен | прид.
Што се однесува на фураж, добиточен, сточен. Фуражни растенија. Фуражни култури. Фуражно производство.
фуражира | св. и несв.
Подготви, подготвува, снабди, снабдува добиточна храна, фураж.
фуражомелачка | ж.
Машина за мелење и ситнење на зрнеста сточна храна.
фурашка | ж.
Службена капа со тврда стреа како дел од униформа.
фургон | м.
Затворен вагон за превоз на багаж, поштенски пратки и др., сместен зад локомотивата.
фурда | ж.
Ситни отпадоци од нешто. Го наполни до врв теленото решето и фати да ја сее тутуновата фурда.
фури | несв.
Пренесува грозје од лозјето до домот.
