шнола | ж.
Тока, штипка за прицврстување коса или на дел од облека што служи и како украс. Шарени шноли. Шнола за коса. Метална шнола. Дијамантска шнола.
шнур | м.
Усукана, памучна или свилена врвка, гајтан што служи за усукување, поврзување, пристегнување на делови од облека и сл. Елекот имаше црвени, свилени шнурови преку кои беа протнати златни копчиња.
шовинизам | м.
Идеологија, политика на претерано нагласен, агресивен и екстремен национализам, со непријателство и омраза против другите народи, раси, вери и земји.
шовинист | м.
Приврзаник и следбеник на шовинизмот. Балкански шовинисти. Локални шовинисти.
шовинистички | прид.
Што припаѓа, што се однесува на шовинизам и на шовинист. Шовинистички организации. Шовинистичка пропаганда. Шовинистичко движење.
шогун | м.
Воен владетел во Јапонија, титула што ја давал императорот и со која се овозможувало владеење со определена територија.
шогунат | м.
Област во Јапонија со која владее шогун.
шок | м.
(мед.) Состојба на нарушеност на сите функции на организмот, слабост, општо растројство на делови од системот или на целиот систем во организмот. Инсулински шок. Нервен шок. Електричен шок.
шокантен | прид.
Изненадувачки, вознемирувачки. Шокантни податоци. Шокантни бројки.
шокира | св. и несв.
Изненади, изненадува, зачуди, зачудува, предизвика, предизвикува шок. Таа ги шокира со своето облекување. Тој ги шокира со ненадејното доаѓање.
