начешла | св.
Со чешлање убаво замазни коса наназад. Косата му беше секогаш начешлана.
начин | м.
Постапка при вршењето на некоја работа. Начини на употреба на апаратот. Начин на производство. На еден или на друг начин. На ист начин.
начисто | прил.
Без нејаснотии, разјаснето, јасно. Беше начисто дека по таа расправија треба да се разделат. Не беше начисто дали треба да се согласи. Да бидеме начисто со тоа.
начита се | св.
Прочита доволно, многу, до задоволување. Се начита историски романи.
начитан | прид.
Што прочитал многу книги, што знае многу бидејќи многу читал. Ја прикажуваа како многу убава и начитана жена.
начичка | св.
Набоде, закачи многу чички, боцки. Кога стана, виде дека сиот се начичкал.
начичкан | прид.
Накачен со многу чички, боцки и сл. Начичканото килимче со секакви чички едвам го исчистија.
начкрта | св.
Лошо, набрзина напише или нацрта нешто.
начне | св.
Почне, започне. Подобро да не го начнуваме тој разговор.
начпара | св.
Гребне, направи гребаница со нешто остро (игла, нокт, трн и др.) Му ја начпара раката.
