парагон | м.
Образец, тип.
параграф | м.
Дел од текст со нов, вовлечен ред (обично во правилник, закон и сл.) со кој започнува нов став со самостојно значење; пасус, алинеја. Вториот параграф претставува краток осврт на творештвото на авторот. Параграф од кривичниот законик.
парада | ж.
а) Свечена војничка смотра. б) Свечена поворка на спортски, синдикални и други организации. Првомајска парада. в) Голема, раскошна приредба, прослава, свеченост. Фестивалот претставуваше вистинска парада на џезот.
параден | прид.
Што се однесува на парада, што е наменет за парада, што учествува во парада. Параден марш. Парадна униформа. Парадни групи.
парадентоза | ж.
Хронично воспаление на забното непце што обично доведува до испаѓање на забите.
парадентозен | прид.
Што е предизвикан од парадентоза. Парадентозен процес.
парадигма | ж.
(грам.) Образец за промената (формите) на зборовите (именки, придавки, глаголи и др.). Глаголска парадигма.
парадира | несв.
Учествува во парада; оди со параден чекор, маршира.
парадокс | м.
Мислење што изгледа спротивно на општо усвоеното, што изгледа бесмислено, нелогично и што навидум не содржи вистина; бесмислица, апсурд.
парадоксален | прид.
Што е заснован врз парадокс, што изгледа неверојатен, необичен; бесмислен. Парадоксален заклучок. Парадоксална состојба.
