прегозба | ж.

Гозба што ја приредуваат зетот и невестата за родителите на невестата во првиот четврток по свадбата.

прегозбар | м.

Учесник во прегозба.

преголем | прид.

Што е премногу, претерано голем. Преголем товар. Преголем интерес. Преголема радост.

прегон | м.

Правоаголен дел добиен при делење на една парцела заради полесно орање.

прегор | м.

Суво, исушено место на нива каде што ништо не расте. Сушното лето му ја претвори нивата во прегор.

прегори | св.

а) Направи да загори, да изгори, испече повеќе отколку што е потребно. Домаќинката го прегоре ручекот. Фурнаџијата го прегоре лебот. б) Изгори, се испече поради силен оган, горење и сл. Целата инсталација ни прегоре. Светилките прегореа.

прегост | м.

прегости | св.

Нагости, нахрани некого обилно, повеќе отколку што е потребно. Родниниве нè прегостија.

преграб | м.

Прегратка, прегрнување. Братски преграб. Љубовен преграб.

преграби | св.

Опфати некого или нешто со двете раце; прегрне, гушне. Детето го преграби дрвото со рацете. Свирачот ја преграби гајдата и засвири. Тој ја преграби жена си со рацете.