свие | св.
Придаде на нешто полукружна форма; наклони, наведне нешто надолу. Со силните раце ковачот лесно го сви железото. Песот ја сви опашката и со квичење замина. Ветрот ги сви младите и кревки гранки на јаболкницата во дворот.
свика 1 | св.
Викне силно еднаш или одеднаш. Тој најпосле свика по келнерот да донесе нешто и да ги почести момчињата. Свикав, свесен дека постапувам како дете.
свика 2 | св.
Покани, повика мнозина да се соберат на едно место; покани луѓе на заседание, советување. Директорот свика итен состанок. Командантот ги свика офицерите и им ги раздели задачите.
свикне | св.
Направи некој да добие навика, привикне некого на нешто. Најпрвин беше тешко, но подоцна воспитувачите децата ги свикнаа на ред.
свила | ж.
Конец, влакно произведено од кожурецот свилена буба. Точи свила.
свилар | м.
Тој што произведува или што продава свила.
свиларка | ж.
Жена свилар. Свиларките точеа свила од кожурците на свилената буба.
свиларница | ж.
Работилница, фабрика за изработка на свила.
свиларски | прид.
Што се однесува на свилар и свиларство. Свиларски занает. Свиларски комбинат. Свиларски реон.
свиларство | ср.
Стопанска гранка за производство и обработка на свила.
