рузмарин | м.
Вид средоземноморско растение со кожести лисје и ситен син цвет од кој се добива етерично масло; Rosmarinus officinalis.
руина | ж.
Остаток од тоа што пропаднало, што се урнало, што се растурило; урнатина. По бомбардирањето, од градот останаа само руини.
руинира | св. и несв.
Урне, урива нешто, сруши, руши.
руј 1 | м.
Разгранета грмушка чии листови наесен поцрвенуваат, се употребуваат за штавење; Rhus cotinus. Материјалот што се бојадисува се потопува во раствор од руј.
руј 2 | м.
Руменило. Рујот од зората се појави на исток.
рулек | м.
Мало дете, пеленаче, бебе. Невести со рулци на рацете
рулет | м.
Коцкарска направа, кружна направа со бројки на неа што се врти. Фрлаа коцки и вртеа рулет. Рулетот и натаму непрекинато се врти.
рум | м.
Вид жесток пијалак што се добива со дестилација на превриена меласа од шеќерна трска. Шише рум. Чај со рум.
румба | ж.
Вид танц; музика за таков танц. Оркестарот свиреше румба.
румен | прид.
За лице, образи и сл. ‒ што е со руменина. Усни румени. Детенце со румени обравчиња.
